Hún og körfuboltakappinn Tristan Thompson eignuðust annað barn sitt saman með hjálp staðgöngumóður í byrjun ágúst. Fyrir eiga þau dótturina True Thompson, 4 ára.
Þau hættu saman í byrjun árs 2022 eftir að það kom í ljós að Tristan hélt framhjá henni – aftur – og í þetta sinn feðraði hann barn með einu viðhaldinu.
Þess vegna voru aðdáendur hissa þegar fréttir bárust í júlí síðastliðnum að fyrrverandi parið ætti von á barni. Samkvæmt erlendum miðlum var staðgöngumóðirin komin nokkrar vikur á leið þegar Khloé komst að framhjáhaldinu.
Hingað til hefur Khloé ekki rætt opinberlega um meðgönguna eða son sinn. Hún rýfur þögnina í viðtali við Elle og segist elska að vera tveggja barna móðir. „Ég veit að ég er algjör klisja, en ég elska allt. Meira að segja það erfiða,“ segir hún.
„Það er heiður og gjöf að fá að móta þessar litlu manneskjur í ótrúlega einstaklinga,“ segir hún og bætir við að það sé mikilvægt að taka þessu hlutverki alvarlega.
Heimildarmaður E! News segir að Khloé hafi haldið meðgöngunni leyndri til að „tryggja öryggi og einkalíf staðgöngumóðurinnar og til að vernda andlega heilsu sína gegn almenningsáliti vegna gjörða Tristans.“
