Þórhildur Magnúsdóttir heldur námskeið fyrir pör, Stórkostleg sambönd, og heldur einnig úti vinsælu Instagram-síðunni Sundur og saman (@sundurogsaman).
Þar leyfir hún fylgjendum sínum að skyggnast á bak við tjöldin í fjölkæru sambandi, en Þórhildur aðhyllist fjölástalífsstíl. Hún á eiginmann og kærasta og ræddi nánar um það í Mannlega þættinum á Rás 1.
Þórhildur kynntist eiginmanni sínum í framhaldskóla þegar hún var sautján ára, árið 2007, og eiga þau saman tvö börn. Þau ákváðu að opna sambandið fyrir rúmlega fjórum árum síðan. Hún sagði í Mannlega þættinum að hún líti á það sem gleðiefni þegar eiginmaður hennar fer á stefnumót með öðru fólki og engin takmörk séu á hversu mörg sambönd þau mega eiga við aðra utan hjónabandsins.
„Þú myndir ekki takmarka hversu marga vini konan þín á, og að sama skapi erum við ekki að takmarka hversu mörg sambönd. Hvort maðurinn minn myndi vilja fara á deit með konu sem honum líst á,“ segir hún.
Hjónabandið var þó ekki opnað sísvona heldur tók við langur undirbúningur að sögn Þórhildar.
„Það fóru alveg tveir þrír mánuðir í að tala um þetta og endurskoða hvernig við lítum á sambönd og sambandið okkar. Þetta var langur undirbúningur áður en við ákváðum að opna,“ sagði hún.
Þegar þau opnuðu sambandið héldu margir í kringum þau að skilnaður væri yfirvofandi en Þórhildur segir þessa ákvörðun hafa styrkt sambandið.
Þórhildur á kærasta sem hún kynnti fyrir fylgjendum sínum fyrr á árinu, en þau kynntust í lok sumars 2021.
Í þættinum sagði Þórhildur að eiginmaðurinn og kærastinn „þekkjast lítið en þetta er enginn feluleikur eða þannig […] Það er ekki þannig að þeir vilji ekki hittast en maður þekkir þá á öðrum forsendum.“
Hún tók dæmi sem að einstaklingur á kannski vin sem hann fer með í fjallgöngur og svo annan vin sem hann fer með í golf.
Þórhildur ræðir nánar um þetta í þættinum sem má hlusta á í heild sinni hér.
Fylgstu með Þórhildi á Instagram þar sem hún er dugleg að deila alls konar sambandsfróðleik og fréttum úr sínu lífi.
