Leikkonan Megan Fox og tónlistarmaðurinn Machine Gun Kelly hafa opinberað trúlofun sína, en Megan sagði já á þriðjudaginn og hefur nú deild myndbandi af Kelly á skeljunum á Instagram.
Með myndbandinu deildi hún texta þar sem hún leit yfir samband þeirra. Þar sagði hún að í júlí 2020 hafi hún og Kelly setið undir trénu þar sem hann fór á skeljarnar og vonast eftir göldrum.
„Við höfðum ekki hugmynd um þann sársauka sem við þurftum að horfast í augu við saman á svona skömmum tíma. Við vissum ekki hversu mikla vinnu og fórnir við þyrftum að færa fyrir sambandið en við vorum í vímu af allri ástinni. Og karmanu.
Einhvern veginn, einu og hálfu ári síðar, eftir að hafa gengið í gegnum eld og brennistein saman og hlegið meira en ég hélt að væri hægt, þá fór hann á skeljarnar. Og alveg eins og í öllum lífum sem ég hef lifað, og öllum lífum sem ég mun lifa, sagði ég já
…. og svo drukkum við blóð hvors annars.“
Kelly hefur einnig deilt trúlofuninni á sínum samfélagsmiðlum. Þar minntist hann ekkert á blóðdrykkjuna heldur aðeins á hringinn sem hann gaf Megan.
„Ég veit að hefðin er að gefa einn hring, en ég ásamt hönnuðinum Stephan Webster hannaði tvo.“
Kelly segir að hringarnir tveir blandi saman smaragði, sem sé fæðingarsteinn Megan, og demanti sem sé fæðingarsteinn hans. Hringarnir væru svo seglar sem draga hvort annan að sér eins og tveir helmingar sömu sálarinnar. En Megan hefur áður sagt í viðtölum að hún sé þeirrar trúar að hún og Kelly séu „tvíbura eldar“ eða með öðrum orðum ein sál sem hafi verið skipt milli þeirra tveggja.
