Katrín Ósk Jóhannsdóttir beitti frumlegu ráði til að takast á við alvarlegan kvíða og félagsfælni sonar síns er hún gaf út bókina Mikilvægasta dagbók sem ég mun eiga.
Um er að ræða bók sem með einföldum og markvissum hætti hjálpar til við að byggja upp sjálfstraust. Bókin olli fyrst miklum umskiptum til hins betra í lífi sonar Katrínar en breiddist síðan út til margra Íslendinga sem kunnu afar vel að meta þessa óvenjulegu dagbók og notuðu hana sér til gagns.
Sjá einnig: Dagbókin sem bjargaði syni Katrínar breiðist út – „Þetta er kraftaverk“
Katrín hefur nú gefið út bókina Ég er til, Því að ég Finn; Tilfinningar. Þetta er önnur dagbók Katrínar í átt að betri líðan og andlegu heilbrigði. Í kynningartexta um bókina segir meðal annars:
„Þær tilfinningar sem við ýtum til hliðar og atburðir sem við ákveðum að láta ekki hafa áhrif á okkur, munu ganga aftur og ásækja okkur. Vextirnir geta orðið okkur dýrkeyptir og komið í formi andlegra og/eða líkamlegra veikinda.
Manneskjan er mikil tilfinningavera, jafnvel sú íslenska, og getur stór flóra tilfinninga okkar verið heilmikil rússíbanareið. Í daglegu amstri okkar gefum við okkur oft lítinn tíma til þess að skoða líðan okkar og greina það sem við finnum og af hverju. Þegar við loks komumst í ró og getum veitt atburðum dagsins athygli höfum við gleymt stórum hluta hans og aðeins stærstu tilfinningarnar haldast í minni okkar.
Þessi dagbók mun veita þér yfirsýn yfir líðan þína og fyrirferðamestu tilfinningar þínar yfir alla daga vikunnar, næstu fjórar vikur.“