Athafnakonan og áhrifavaldurinn Lína Birgitta Sigurðardóttir er einn helsti sérfræðingur landsins um merkjavörur.
Hún á og rekur íþróttavörumerkið Define The Line. Hún er einnig afar vinsæl á samfélagsmiðlum með rúmlega 23,5 þúsund fylgjendur á Instagram. Hún er dugleg að sýna frá tískuvörunum sem hún hefur fjárfest í og deilir reglulega myndböndum þar sem hún tekur upp nýjar vörur og bregst við í beinni.
Sjá einnig: Verðmæti merkjavörusafns áhrifavaldsins Línu Birgittu hleypur á milljónum – Sjáðu myndir og listaverð
Lína Birgitta er að selja nokkrar merkjavörur núna á Instagram. Hún auglýsti lítið notaða Dior skó fyrr í dag. Skórnir kosta nýir 130 þúsund og vill hún 100 þúsund fyrir þá.
„Ég ætla að selja nýju Dior skónna sem ég keypti mér um daginn! Þeir kosta 130 þúsund en ætla að selja þá á 100 þúsund ef einhver vill kaupa þá,“ segir Lína Birgitta.
„Ég hef notað þá einu sinni og þeir eru í stærð 39.“
Lína segist ætla að selja fleiri skó og töskur. „Því ég á orðið svolítið mikið af dóti núna. Hélt ég myndi aldrei segja þetta,“ segir hún.
Hún er búin að auglýsa tvö veski en von er á fleiri vörum seinna í dag eða um helgina.