Hinn rómaði kokkur og matreiðslubókahöfundur, Nanna Rögnvaldsdóttir, sakaði í gær Sigmund Davíð Gunnlaugsson, formann Miðflokksins, um að skreyta sig með stolnum fjöðrum, er brauðtertuuppskrift, sem virðist byggjast að miklu leyti á uppskrift Nönnu, var birt sem uppskrift formannsins í uppskriftaútgáfu Heimkaupa.
Nanna þótti málið ekki vera alvarlegt en var nokkuð undrandi á þessu tiltæki þingmannsins. Hún sagði í samtali við DV í gær:
„Þetta er afbragðs uppskrift og honum er alveg velkomið að nota hana en ég hefði kannski gert það aðeins svona öðruvísi. Við skulum samt ekki segja stela, en stæla. Allavega þá finnst mér mjög fyndið að hann skuli birta þetta sem sína uppskrift. En útlitið er að vísu allt annað, ég skal alveg viðurkenna það. Hann er ekki að taka það frá mér.“
Sigmundur Davíð svarar fyrir málið í nýrri Facebook-færslu þar sem hann lýsir yfir dálæti á bæði brauðtertum og Nönnu. Hann segir að líklega hafi þarna einhver sem vinnur fyrir flokkinn svarað fyrirspurn Heimkaupa fyrir sína hönd en að sjálfsögðu taki hann fulla ábyrgð á málinu:
„Eftir 12 ár kom loks að því að ég þyrfti að takast á við erfitt mál í pólitík og það nú rétt fyrir kosningar. Hér vísa ég augljóslega í stóra brauðtertumálið.
Einhvers staðar mun hafa birst frétt um uppskrift að uppáhalds brauðtertunni minni. Í ljós kom að hún virðist byggð á leiðsögn Nönnu Rögnvaldsdóttur (án þess að um það væri getið).
Væntanlega var þetta afrakstur erindis sem einhver hefur svarað fyrir mína hönd í kosningaönnum, vitandi að ég var veikur fyrir brauðtertum og tíðrætt um það í fermingarveislum og á kosningaskrifstofum.
Ég verð þó að taka fulla ábyrgð á málinu.“
Sigmundur Davíð segir að honum þyki leitt að Nanna hafi orðið fórnarlamb í þessu máli og hann greinir frá því að hann hafi neitað sér um brauðtertur í meira en tvö ár og sé við það að falla á því bindindi. Skemmtilega færslu hans má lesa með því að smella á tengilinn hér fyrir neðan: