Samfélagsmiðillinn Instagram er einn sá vinsælasti í heimi, jafnt hjá ungum sem öldnum. Nýlega var gerð stór breyting á forritinu sem ekki allir eru jafn sáttir með.

Hægt er að birta myndir á síðuna sína og í „story“ en þar eyðast myndirnar eða myndböndin út eftir 24 tíma. Áður fyrr spiluðust myndbönd aðeins einu sinni og myndir voru uppi í 15 sekúndur áður en forritið færði þig sjálfkrafa yfir á næstu færslu. Nú hefur því verið breytt.

Fyrir ofan myndirnar og myndböndin sem voru í spilun mátti sjá slá sem sýndi hversu margar færslur voru uppi og hversu mikill áhorfstími væri eftir af myndum og myndböndum. Sú slá er nú horfin og spilast myndbönd aftur og aftur þar til notandinn ýtir á skjáinn til að sjá næstu færslu.

Uppfærslan virðist ekki vera komin í alla síma en búast má við því að þetta taki við hjá öllum á næstu dögum. Instagram segir tilganginn vera að fólk eigi að geta notið sín þegar það skoðar „story“.