Hinn goðsagnarkenndi spennutryllir „Svartur á leik“ kom í dag út bæði sem bæði hljóðbók og rafbók hjá Storytel. Rúnar Freyr Gíslason leikari les.
Stefán Máni Sigþórsson, höfundur bókarinnar, er einn vinsælasti spennusagnahöfundur þjóðarinnar segist fagna þessum áfanga. „Þessi bók var auðvitað gríðarlegur „hittari“ á sínum tíma og er örugglega enn mest selda bókin mín á Íslandi,“ segir hann.
Svartur á leik var fyrst gefin út árið 2004 og kvikmynd byggð á bókinni var frumsýnd árið 2011.
Stefán Máni segist hafa unnið náið með teyminu sem færði bókina á hvíta tjaldið og að hann hafi lært mikið af því ferli. „Ég sá þá hvernig kvikmyndagerðarfólk hugsar. Þar er meira verið að skera niður og straumlínulaga. Ég lærði betur hvað skipti virkilega máli og það hefur síðan haft áhrif á skrifin mín. Ég er orðinn hnitmiðaðri.“
Áður en hljóðbókin kom út nú fór Stefán Máni yfir hana með þetta að leiðarljósi og segir hann bókina enn betri nú.
„Það er komin ný kynslóð sem hefur ekki lesið bókina og tilvalið að skella sér á hljóðbók eða rafbók um helgina.“
Von er á nýrri spennusögu frá honum fyrir jólin en hann lætur ekkert uppi um söguþráðinn. „Svartur á leik er fín til að hita upp glæpahluta heilans fyrir jólin.“
Þá fagnar Stefán Máni ennfremur 25 ára höfundarafmæli í ár en hann hefur gefið út á þriðja tug bóka. Hans helstu viðbrögð við því þessu afmæli eru: „Það hljómar skelfilega að eiga 25 ára rithöfundarafmæli. Ég er greinilega búinn að vera lengur í bransanum en ég hélt.“