Til eru nokkrar óskrifaðar reglur um brúðkaup. Sú frægasta er sú að klæðast ekki hvítu ef þú ert ekki brúðurin, hvað þá hvítum síðkjól.
Önnur regla varðar eiginlega bara almenna skynsemi en virðist þó vefjast fyrir einhverjum. Það er að ganga ekki í veg fyrir brúðhjónin er þau ganga upp að altarinu.
Ein brúður deildi myndbandi úr brúðkaupi sínu á Reddit. Þar má sjá konu, í hvítum kjól, ganga í veg fyrri brúðguman og trufla innkomu hans í athöfnina. Umrædd kona er stjúpmóðir brúðgumans.
„Kærasta tengdapabba míns eyðilagði athöfnina með því að vera fyrir eiginmanni mínum á meðan hann gekk upp að altarinu. Hún hunsaði okkur svo alla helgina,“ skrifaði brúðurin með myndbandinu.
Í myndbandinu sést konan ganga fyrir brúðgumann og smeygja sér framhjá honum. Brúðgumanum virðist ekki vera brugðið yfir hegðun hennar en verður nokkuð pirraður. Hann tautar: „Jesús Kristur“ og ranghvolfir augunum. Ekki nóg með það þá er hún í mjög ljósum síðkjól.
Myndbandið hefur vakið mikla athygli undanfarinn sólarhring. „Hún var bara sjálfri sér til skammar. Ekki leyfa henni að eyðileggja daginn ykkar, hún var bara að reyna að láta hann snúast um sig. Sjálfhverft fólk vill vera í sviðsljósinu sama hvað,“ skrifaði einn netverji.
„Vá, brúðkaupið er utandyra þannig hún hefði augljóslega getað farið hinum megin frekar en niður altarið. Hún vildi vera fyrir, hversu ömurleg,“ skrifaði annar.
„Ég er í kasti yfir svipbrigðum hans. Það er eins og hann sé ekki einu sinni hissa,“ skrifaði sá þriðji. Þú getur horft á myndbandið hér.
