Sigmundur Davíð Gunnlaugsson, formaður Miðflokksins, er ekki sá hefðbundnasti á samfélagsmiðlum þessa stundina. Í vikunni birti hann myndband af sér borða hrátt hakk sem vakti mikla athygli, og í gær birti hann furðulega myndaseríu á Facebook af sjálfum sér að leika við hunda.
Sjá einnig: Stórfurðulegt myndband Sigmundar Davíðs vekur mikla athygli – „Á hvað var ég að horfa?“
Samkvæmt færslu Sigmundar eru myndirnar teknar í Öxarfirði, en hann segir hundana þar hafa tekið sér vel. „Hugsanlega fundu þeir kjötlykt.“ Skrifar hann og vitnar þá hakkátið fræga.
Á myndunum má sjá Sigmund í allskonar áhugaverðum stellingum að leika við hundana.
Ekki botna allir í þessari einkennilegu samfélagsmiðlahegðun fyrrverandi forsætisráðherrans, en sumir hafa velt því fyrir sér hvort hann sé hreinlega að reyna að vekja athygli á sjálfum sér fyrir kosningarnar sem fara fram í haust.
Miðflokkurinn hefur nefnilega ekki verið að mælast neitt sérlega hátt í síðustu skoðanakönnunum. Í könnun Gallup sem birt var í lok júlí var flokkurinn með 7.4% fylgi sem er næst minnst allra flokka sem nú eru á þingi.