Bubbi Morthens hefur fjarlægt mynd sem hann birti af sér og Hafþóri Júlíusi Björnssyni í gær og beðist afsökunar á myndbirtingunni.
Óhætt er að segja að myndin hafi vakið hörð viðbrögð þegar Bubbi birti myndina í gær. Lét hann eftirfarandi texta fylgja með á ensku, í lauslegri þýðingu blaðamanns: „Svo mikil virðing. Það eru fáir íþróttamenn sem geta skipt svona á milli íþrótta og verið svona góðir í því! En Fjallið getur það!“
Skjáskot af upphaflegu myndinni má sjá hér að neðan.
Myndin stóð frá því í gærkvöldi og þangað til í morgun, þegar hún var fjarlægð. Höfðu þá þúsundir ýmist líkað við myndina, eða tjáð sig undir henni.
„Nei andskotinn, og í dag af öllum dögum,“ skrifar ein, og vísar þá til þess að halda átti Druslugönguna í gær, en hún var blásin af vegna samkomutakmarkana og fjölgunar í Covid-19 tilfellum. „Hvernig get ég gefið þolendum fokkjúputtann án þess að sýna puttann. Á degi Druslugöngunnar hvorki meira né minna,“ skrifaði önnur.
Aðrir bentu á fortíð Hafþórs Júlíusar, en hann hefur verið sakaður um að hafa beitt fyrrum kærustu sína ofbeldi. „Einmitt, hömpum meintum ofbeldismanni,“ skrifar ein og rifjar upp þessa sögu Hafþórs. „Frábært að hampa Þúfunni á degi druslugöngunnar,“ skrifar önnur.
Tanja Ísfjörð er ein þeirra sem hefur farið fyrir hönd samtakanna Öfga. Hún skrifar undir færslu hans Bubba: „Æi nei Bubbi.“
Skjáskot af nokkrum færslunum má sjá hér að neðan.
Sem fyrr segir hefur Bubbi fjarlægt færsluna og snéri sér á Twitter til þess að biðjast afsökunar á mistökum sínum. Færslu hans þar má sjá hér að neðan.
Lífið er svart og hvítt með alla litina á milli við gerum öll mistök stundum mörgum sinnum um æfina við erum mannleg myndin af mér með Hafþóri var taktlaus og mistök af minni hálfu 🙏❤️😩 maður lærir af mistökum sínum þegar maður sér þau blasa við ást og kærleikur❤️
— Bubbi Morthens (@BubbiMorthens) July 25, 2021