Miðbær Reykjavíkur hefur verið troðfullur allar helgar frá því að samkomubanni var aflétt og hafa flest allir Íslendingar farið á alvöru íslenskt djamm eftir 18 mánaða hlé.
Frægir Íslendingar eru engin undantekning og sáust mörg kunnugleg andlit á skemmtistöðum í vikunni. Djammið byrjaði á fimmtudegi eða „litla föstudegi“ eins og hann er stundum kallaður.
Á American Bar var Bacardi Breezer-kvöld og á 203 var autotune-kareoke með Góa Sportrönd en báðir viðburðir drógu til sín ágætis magn af gestum. Seinna um kvöldið sást til Ingó Veðurguðs á nýja skemmtistað Birgittu Lífar, Bankastræti Club, en hann var þar ásamt félögum sínum.
Á föstudeginum var skemmtistaðurinn Húrra opnaður með tilheyrandi látum þar sem Hipsumhaps hélt tónleika. Það var hann Geoffrey Þór Huntington-Williams, eigandi Priksins, sem endurreisti þennan gífurlega vinsæla stað.
Á meðal tónleikagesta voru nokkrar Reykjavíkurdætur, þar á meðal Steiney Skúladóttir og Þuríður Blær Jóhannsdóttir. Hugleikur Dagsson kíkti einnig á tónleikana og sá Hulda Kristín Kolbrúnardóttir sem sló í gegn með Gagnamagninu í Eurovision um að allir fengju nóg að drekka en hún er barþjónn á Húrra.
Það sást til Áslaugar Örnu á Akureyri um helgina en hún skemmti sér á Hótel KEA og á Götubarnum. Vinkona hennar, Birgitta Líf Björnsdóttir, var sama kvöld á Bankastræti Club ásamt vinum sínum, þar á meðal Herði Björgvini Magnússyni, landsliðsmanni í fótbolta.
Á laugardeginum mátti sjá bæði Fannar, söngvara Hipsumhaps, og rapparann Joey Christ á Röntgen en Joey þeytti síðan skífum á Prikinu. Halldór Gylfason leikari sást í bænum um kvöldið en hann tók strætó heim rétt eftir klukkan 23.
Siggi Gunnars, útvarpsmaður, sá um að þeyta skífum á Kiki og hélt hann uppi góðri stemningu þar.