Erpur Eyvindarson, einnig þekkur sem Blaz Roca, er orðinn ansi þreyttur á „sjónvarpssöngli“. Það kemur skýrt fram í viðtali hans við Fréttablaðið, en hann hlakkar til þess að spila á Þjóðhátíð í Vestmannaeyjum, ásamt hundunum í XXX Rottweiler, og bjóða landanum upp á „alvöru dæmi“.

Á meðan samkomutakmarkanir voru sem mestar hér á landi vegna heimsfaraldursins urðu sjónvarpstónleikar ansi vinsælir. Þar voru fremstir í flokki Helgi Björnsson, með þáttinn Heima með Helga í Sjónvarpi Símans og Ingólfur Þórarinsson, betur þekktur sem Ingó Veðurguð, sem sá um þáttinn Í kvöld er gigg sem var á dagskrá Stöðvar 2.

Í viðtalinu skýtur Erpur föstum skotum að þessari sjónvarpsmenningu sem hefur myndast á síðustu mánuðum: „Það er ekki búið að vera rassgat að frétta og fólk bara búið að vera að horfa á svona sjónvarpsskemmtikrafta.“ segir hann og kallar það „krepputímabil lifandi tónlistar“.

„Það er búið að vera sjónvarpssöngl af ýmsu tagi. Svona sitjandi gítargutl og það er rosalega mikilvægt að við komum þarna á einmitt þessa hátíð og biðjum bara að heilsa þessu krepputímabili lifandi tónlistar með alvöru dæmi,“

Erpur segir gott að XXX Rottweiler hundar séu framarlega á Þjóðhátíð svo fólk geti notið einhvers annars en „sjónvarpssöngls“

„Þess vegna er svo gott að við séum framarlega á fyrstu Þjóðhátíð eftir að fólk getur leyft sér að njóta annars en sjónvarpssöngls.“

Fyrir þá sem hafa áhuga á „sjónvarpssönglinu“ sem Erpur talar um þá mun Helgi Björnsson vera með kvöldtónleika í beinu streymi frá Hótel Borg á laugardagskvöldið um Verslunarmannahelgina. Það sama er líklega ekki hægt að segja um Ingó, en líkt og alþjóð veit hefur hann verið afbókaður af Þjóðhátíð, en þar átti hann að sjá um brekkusönginn fræga.