Tómas Steindórsson hefur á síðustu árum fest sig í sessi sem einn ástsælasti Twitter-notandi þjóðarinnar. Þrátt fyrir að einhverjir aðilar hafi stöku sinnum reynt að fella Tómas fyrir óúthugsuð ummæli hans þá kemur hann alltaf sterkari til baka. Þá er einnig vert að taka það fram að Tómas er heimsmeistari í bolluáti. Tómas er þessa stundina að stíga sín fyrstu skref í fjölmiðlabransanum en hann sér um morgunþátt á X-inu 977 alla virka morgna í fjarveru Harmageddon-bræðra.
Í þætti dagsins ákvað Tómas að fjalla um hakkarann sem hefur undanfarna daga herjað á áhrifavalda landsins. Tómas ákvað að heyra í einum áhrifavaldi að nafni Júnía Apríl til að tékka á stöðunni. „Hvernig svona leggst þetta aðgangsleysi í þig?“ spyr Tómas í byrjun símtalsins við Júníu en Júnía svarar ekki, hún hágrætur bara.
„Þetta er ekkert gamanmál,“ segir Tómas þá og spyr hana hvort hún sjái ekki fram á að geta endurheimt reikninginn sinn en Júnía grætur áfram. „Aumingja Júnía, þetta er náttúrulega ekkert gamanmál í rauninni. Mikið tekjutap en ég vona að þetta blessist og að þau fái öll reikninginn sinn aftur.“
Nafnið Júnía Apríl fær eflaust einhverja til að hugsa að um falskt nafn sé að ræða. Það er líklegast rétt enda er ekkert að finna um Júníu á internetinu, sem væri óvenjulegt ef um raunverulegan áhrifavald væri að ræða. Það gerir símtalið þó ekkert verra að Júnía sé ekki til en hægt er að hlusta á símtalið í spilaranum hér fyrir neðan.