Billie Eilish er án efa ein stærsta tónlistarstjarna heimsins um þessar mundir. Hvert einasta lag sem hún gefur út sprengir spilunarlista en einhverjir aðdáendur hennar eru þó á þeirri skoðun að hún sé að ganga í gegnum erfitt tímabil þegar kemur að tónlistinni, það er að segja að lögin sem hún hefur gefið út að undanförnu séu ekki nógu góð.
Þessi 19 ára stórstjarna lætur það þó ekki á sig fá. Hún birti nýverið myndband á samfélagsmiðlinum TikTok þar sem hún skaut fast á þá sem hafa gagnrýnt nýju lögin sín. „Er það bara ég eða er Billie að eiga erfitt tímabil, hvers vegna er hún svona léleg núna?“ sagði í athugasemd sem Billie ákvað að nota í myndbandið sem hún birti á TikTok. Í myndbandinu má sjá Billie sitjandi og hlægjandi á meðan hún ranghvolfir augunum vegna athugasemdarinnar. Þá má heyra nýjasta lagið hennar, NDA, spilast í bakgrunninum á myndbandinu.
Þrátt fyrir að Billie hafi ekki sagt neitt til baka í myndbandinu sjálfu þá skaut hún harkalega til baka í textanum sem hún lét fylgja með myndbandinu. „Bókstaflega það eina sem ég sé á þessum samfélagsmiðli… étið rykið mitt, brjóstin mín eru stærri en ykkar,“ sagði hún í textanum.