Ólafur F. Magnússon, læknir, fyrrverandi borgarstjóri og laga- og ljóðasmiður, hefur sent frá sér nýtt lag og myndband. Lagið ber heitið Fósturmold. Ólafur skilgreinir það sem ættjarðarlag: „Ljóð og lag kom upphaflega til mín 18. maí 2017 en það sótti fast á mig þegar eldgosið hófst í Geldingadölum 18. mars síðastliðinn og úr hefur orðið dýrt kveðinn og kraftmikill ættjarðaróður,“ segir Ólafur.

„Í þetta sinn syng ég lagið sjálfur enda þótt það sé krefjandi í flutningi en ég á góða að þar sem eru söngkennari minn Guðlaug Dröfn Ólafsdóttir og eins og svo oft áður þá útsetur Vilhjálmur Guðjónsson lagið og leikur á öll hljóðfæri. Laginu fylgir frábærlega vel gert myndband Friðriks Grétarssonar, sem hefur verið iðinn við að mynda eldgosið á öllum stigum þess,“ segir Ólafur enn fremur.

Hér að neðan birtist texti lagsins og þar fyrir myndband með flutningi þess.

Kynslóðirnar koma og fara,

kynslóðirnar hverfa á braut.

Ef ei þær hafa á sér vara,

öðrum munu valda þraut.

Við bláma himins, heitan funa,

hlýjast viltu elska land.

Er sérð þú fæðast berg í bruna

og berast yfir hraun og sand.

Ljúfust ást á landi og þjóð

leggur rækt við sögu og fold.

Alla vora ævislóð,

æ skal gæta að fósturmold.