Floyd Mayweather, einn besti hnefaleikakappi allra tíma, og Logan Paul, YouTube-stjarna, munu berjast þann 6. júní næstkomandi á Hard Rock-vellinum í Miami. Mayweather hefur barist 50 sinnum og sigrað alla bardaga sína á meðan Paul hefur aðeins einu sinni barist og tapaði hann þeim bardaga.
Í gær mættust þeir kappar í fyrsta skiptið til að auglýsa bardagann. Þeir stóðu tveir uppi á sviði og jusu fúkyrðum yfir hvorn annan á meðan fjölmiðlar fylgdust með. Eitt af því sem kom fram var að Floyd sagðist vera tilbúinn að slást við bæði Logan Paul og bróður hans, Jake Paul, á sama kvöldi. Eftir þessa sýningu frá þeim sauð allt upp úr.
Floyd var í viðtali þegar Jake labbaði upp að honum og fór að rífa kjaft. Eftir orðaskiptin tók Jake derhúfuna hans Mayweather og hljóp í burtu. Hann komst ekki langt þar sem fylgdarlið Mayweather reif hann niður og virtust veita honum nokkur högg. Þegar þeir náðu derhúfunni hans Mayweather aftur þá slepptu þeir honum.
Þegar Logan Paul sá mennina halda litla bróður sínum niðri, fauk í hann og hann ætlaði sér að hjóla í Mayweather. Þeir reyndu að skiptast á nokkrum höggum en það gekk brösuglega þar sem fylgdarlið þeirra beggja skarst í leikinn.
Allt í kringum þessi slagsmál virðist vera mjög barnalegt og furðulegt er að sjá fullorðna karlmenn taka derhúfur af hvorum öðrum til að reyna að niðurlægja þá með einhverju móti.