Það kannast eflaust margir við nágranna sem stunda kynlíf reglulega og með miklum hávaða og látum. Yfirleitt leiðir fólk slíkt hjá sér og einbeitir sér að öðru en það var ekki raunin í fjölbýlishúsi nokkru. 

Í færslu á Reddit greinir maður nokkur frá því að hann hafi sett upp miða á hurðina hjá nágrönnum sínum eftir að hafa heyrt miklar stunur og læti frá íbúðinni þeirra. „Það að búa í fjölbýlishúsi þýðir að þú ert nær nágrönnum þínum en gengur og gerist,“ segir á miðanum sem maðurinn hengdi á hurðina.

„Ég gæti búið á allt öðru svæði í byggingunni okkar en ég myndi samt heyra í ykkur stunda þetta háværa kynlíf. Ekki misskilja mig, ég er mjög ánægður að kynlífið ykkar er svona frábært en ég held að ég tali fyrir marga í byggingunni þegar ég bið ykkur um að hafa aðeins lægra.“

Maðurinn ákvað svo að líma USB lykil með miðanum en á honum var upptaka af kynlífshljóðunum til sönnunar fyrir parið. „Ég vorkenni þeim sem búa alveg við hliðina á ykkur,“ segir svo á miðanum. „Ég get ekki sagt að ég njóti þess sérstaklega þegar 5 ára dóttir mín spyr mig: Af hverju er konan að öskra?“

Að lokum biður maðurinn fólkið í íbúðinni vinsamlegast um að vera vakandi fyrir því hve mikill hávaðinn er. „Hvort sem þið eruð að stunda kynlíf saman eða með sjálfu ykkur. Ég dæmi ekki.“