Í Bandaríkjunum var í vikunni fjögurra manna fjölskyldu vikið úr flugvél vegna þess að tveggja ára dóttir þeirra tók alltaf af sér grímuna þegar hún var sett á hana. Móðirin var komin sjö mánuði á leið og voru þau einnig með einhverfan son sinn með sér.
Í myndbandinu sem má sjá hér fyrir neðan kemur flugfreyja og biður þau um að yfirgefa flugvélina vegna grímuerfiðleika dótturinnar, þrátt fyrir að í reglum flugfélagsins sé tekið fram að börn undir fimm ára að aldri þurfi ekki að vera með grímu á meðan flugi stendur yfir.
Aðrir farþegar virðast vera með fjölskyldunni í liði og enginn kvartar yfir því að barnið sé ekki með grímu. Í myndbandinu segir fjölskyldan að aðeins einn aðili um borð í flugvélinni sé ósáttur og þess vegna sé verið að henda þeim úr vélinni.
Þegar þau neita að yfirgefa vélina þá tekur starfsfólkið til þess ráðs að hringja á lögregluna og reka alla farþega úr vélinni. Stuttu seinna er öllum hleypt aftur inn, þar á meðal fjölskyldunni en flugfreyjan er horfin.