Baðlónið Sky Lagoon kemur til með að opna á morgun en baðlónið er staðsett á Kársnesi í Kópavogi. Baðlónið er ein stærsta framkvæmd sem tengist ferðageiranum hér á landi í seinni tíð.
Áætlaður framkvæmdakostnaður lónsins er um fimm milljarðar og mun baðlónið skapa 110 ný störf.
Dagný Pétursdóttir, framkvæmdastjóri Sky Lagoon, er verulega spennt fyrir opnuninni og segir mikla vinnu hafa verið lagða í hönnunina sem dró innblástur sinn af íslenskri náttúru og íslenskri byggingarsögu.
Eitt það fallegasta við lónið er 75 metra óendanleikakantur sem gefur þá tilfinningu að himinn og haf renni saman. Með aðgangsmiða í lónið fylgir sjö skrefa spa-upplifun sem reynir á öll skilningarvit líkamans. Þeir þyrstu þurfa ekki að örvænta en það er bar við lónið þar sem gestir geta pantað sér drykki.
Boðið er upp á einkaklefa en einnig er hægt að fara í almennan klefa eins og við þekkjum úr hefðbundnum sundlaugum landsins.
Fyrir eða eftir bað er hægt að setjast og snæða eða fá sér drykki. Venjulegur aðgangur að lóninu kostar tímabundið 5.990 krónur og mun hækka upp í 8.500 seinna meir. Dýrari aðgangurinn kostar tímabundið 9.900 en mun vera 13.900 eftir einhvern tíma.
Lónið er ekki ætlað börnum yngri en 12 ára og þurfa börn á aldrinum 12-14 ára að vera í fylgd með fullorðnum.