Raunveruleikastjarnan Maura Higgins, sem er hvað þekktust fyrir þáttöku sína í Love Island þáttunum vinsælu, er harmi slegin eftir að gamall maður læddist inn í garðinn hennar til að taka myndir af henni. Maura, sem er 30 ára gömul, segir að sér hafi liðið eins og hún væri í hryllingsmynd en hún opnar sig um atvikið í samtali við Daily Star.
„Þetta var algjörlega hræðilegt. Þetta með gamla manninn, það hræddi mig sérstaklega,“ segir Maura í viðtalinu. „Ég sat úti í sloppnum mínum og ég snéri bara hausnum mínum og sá hann, hann var svo nálægt mér.“
Maura var í garðinum heima hjá sér en hún sá manninn í gegnum runna í garðinum. „Ég leit bara og sá manninn, þetta var eins og í hryllingsmynd. Hann hélt á símanum sínum og ég heyrði að hann var að taka myndir,“ segir hún.
Hún segir þetta vera ein af birtingarmyndum slæmu hliðanna við frægðina. Hún segir þó að góðu hliðarnar geri frægðina þess virði, þær séu mun betri en þær slæmu.