Tveir þýskir karlmenn sem „fundu upp“ bleika einnota plasthanska fyrir konur til að nota þegar þær fjarlægja túrtappa hafa hætt við framleiðsluna og skipt efni á vefsíðu fyrirtækisins út fyrir afsökunarbeiðni.

Mennirnir, þeir Eugen Raimkulow og Andre Ritterswürden, kynntu hugmynd sína upphaflega í þýskum raunveruleikaþætti þar sem frumkvöðlar reyna að fá fjárfesta til liðs við sig. Fjárfestinum Ralf Dümmel leist svo vel á hugmyndina um bleikan einnota plasthanska fyrir konur á túr að hann ákvað að leggja til 30 þúsund evrur, eða andvirði um 4,5 milljóna króna. Dümmel hefur sömuleiðis beðist opinberlega afsökunar á því að hafa ekki áttað sig á raunverulegum þörfum kvenna og greinilegt að viðbrögð við þessari vöru kom þeim mikið á óvart.

Fjallað hefur verið um málið í miðlum um allan heim, svo sem Guardian og Deutsche Welle.

Hanskarnir voru kallaðir Pinky Gloves og fengu þeir Raimkulow og Ritterswürden hugmyndina eftir að þeir bjuggu með konum og sáu notaða túrtappa í ruslinu. Konurnar höfðu vafið klósettpappír utan um túrtappana en stundum sáu þeir að blóð kom í gegn um pappírinn og jafnvel fundu þeir lykt af notuðu túrtöppunum sem þeim fannst „ógeðfelld.“

Með hönskunum töldu þeir sig vera að leysa stórt vandamál fyrir konur og að þær gætu nú sloppið við að snerta bandið sem er fast við túrtappann þegar þær toga hann út úr leggöngunum og síðan vafið bleika einnota plasthanskanum utan um notaðan túrtappann. Þannig yrði allt mun snyrtilegra – fyrir konurnar.

Fljótt fengu þeir yfir sig öldu reiði og gagnrýni þar sem þeir voru sagðir ýta undir hugmyndir um að blæðingar séu óhreinar á einhvern hátt, að hanskarnir væru sérlega slæmir fyrir umhverfið og athugasemdir í þá veru að nú ætluðu karlmenn enn einu sinni að reyna að græða á konum með tilgangslausum varningi. Raunar var það svo að hver hanski átti að kosta meira en hver túrtappi út úr búð í Þýskalandi.

Á Instagramsíðu Pinky Gloves, sem er búið að taka niður, birtust athugasemdir á borð við: „Ég skil ekki hvaða vandamál þeir halda að þeir séu að leysa“ og „Hættiði að segja konum að blæðingar séu ógeðslegar.“

Einhverjir tóku sig svo til og bjuggu til grínsíðu þar sem bláir einnota plasthanskar, Bluey Gloves, eru kynntir sem hentug lausn fyrir karlmenn til að sleppa við að halda með berum fingrum um typpið á sér þegar þeir pissa.