Árið 2011 tóku þeir Auðunn Blöndal og Sverrir Þór Sverrisson þátt í Trailer-keppni í sjónvarpsþáttunum Auddi og Sveppi og gáfu í kjölfarið út stiklu úr kvikmynd sem þeir kölluðu Leynilögga sem sló í gegn. Þá fæddist hugmynd að skrifa handrit að bíómynd út frá stiklunni. 10 árum síðar hófust tökur á kvikmyndinni og er hún væntanleg í Sambíóin á þessu ári.
Tveir knattspyrnuleikmenn sem alþjóð ætti að kannast við, þeir Hannes Þór Halldórsson og Rúrik Gíslason, koma að myndinni. Hannes er handritshöfundur og leikstjóri en Rúrik leikur sitt fyrsta hlutverk í bíómynd.
Aðrir handritshöfundar eru þeir Nína Petersen og Sverrir Þór Sverrisson en sagan er úr hugarheim Auðuns Blöndal, Egils Einarssonar og Hannesar.
Lilja Ósk Snorradóttir hjá Pegasus framleiðir myndina og er Elli Cassata kvikmyndatökumaður.
Auðunn Blöndal, Egill Einarsson, Steinunn Ólína Þorsteinsdóttir, Björn Hlynur Haraldsson, Vivian Ólafsdóttir og Sverrir Þór Sverrisson fara með hlutverk í kvikmyndinni ásamt glæsilegum hópi leikara. Sjá má glitta í heitustu söngvara landsins, þau Bríeti og Jón Jónsson.
Töluverð eftirvænting er fyrir myndinni en miðillinn Variety fjallaði meðal annars um verkefnið og Leynilöggan var til sýnis á kvikmyndahátíðinni Göteborg Nordic Film Market í Svíþjóð.
Hér fyrir neðan má sjá stutta kitlu úr myndinni en von er á stærri stiklu á næstu dögum.