Þegar íbúar í Oldham á Englandi héldu út úr húsi í morgun bjuggust þeir eflaust ekki við að sjá handskrifuðu plakötin sem héngu uppi á trjám, ruslatunnum, ljósastaurum og á fleiri stöðum. Plakötin hafa skapað mikla umræðu þar sem þau eru afar áhugaverð en í þeim er gefið í skyn að framhjáhald verði opinberað. Manchester Evening News greindi frá.
„Heldur þú framhjá eiginkonunni þinni? Það verður opinberað bráðlega. Ertu raðframhjáhaldarinn í götunni?“ stóð til að mynda á einu plakatinu. Á öðru plakati voru stafir úr nafni mannsins sem sagður er vera þessi svokallaði raðframhjáhaldari. „Ertu með þessa stafi í nafninu þín? Framhjáhaldarinn er með þá!“ stóð á því. „Veistu hvar eiginmaðurinn þinn verður í kvöld? Í gærkvöldi? Í síðustu viku?“ stóð síðan á öðru.
Ljóst er að plakötin hafa vakið mikla athygli á samfélagsmiðlum en fólk fylgist spennt með þróun mála. „Þetta er sjúklega mikið og algjörlega óþarfi en mér finnst þetta samt gaman,“ skrifaði til að mynda einn. „Spennan er að drepa mig! Velti því fyrir mér hvenær næsta plakat kemur…“ skrifaði svo annar. „Það eru ábyggilega fleiri en einn maður í Oldham áhyggjufullir núna,“ skrifaði svo enn annar.