Nýlega varð uppi mikið fjaðrafok þegar tónlistarmaðurinn og raunveruleikastjarnan Bassi Maraj lét Bjarna Benediktsson fjármálaráðherra heyra það á Twitter. Færsla Bassa á samfélagsmiðlinum vakti gífurlega athygli og var mikið fjallað um hana í fjölmiðlum hér á landi.
Allt hófst þetta með færslu sem Bassi skrifaði á Twitter þar sem hann sagðist vera svo hugmyndaríkur að hann ætti að gera hugmyndir fyrir Sjálfstæðisflokkinn. Bjarni sá sér þar leik á borði og sagði að allar hugmyndir væru vel þegnar. „Hér er hugmynd… hvar er nýja stjórnaskrán? With ya dumb ass face you aint eating but i swear u got some bum ass taste !? Og hvernig væri að redda mér reikning í panama with your scammin ass allavegana nota peninginn sem þú ert að scama i að kaupa handa mer burkin,“ skrifaði Bassi við því.
Fjaðrirnar fuku svo enn hærra upp þegar stjórnmálafræðiprófessorinn Hannes Hólmsteinn Gissurarson ákvað að stíga í leikinn. „Þú hefur engar hugmyndir, aðeins runu af ókvæðisorðum. Hvernig eigum við að skapa verðmæti? Tryggja frelsi og fjölbreytni? Framfarir? Hagvöxt? Engin svör, aðeins blótsyrði á hrognamáli,“ skrifaði Hannes. Bassi svaraði því tísti með færslu sem hefur verið ansi umdeild. „Jésus hannes hver hleypti þér á Twitter og áður en þú ferð að rífa þig þá á ég ss af grindr spjallinu okkar,“ skrifaði Bassi í færslu sem nú hefur verið eytt. Margir hafa sakað Bassa um að með þessari færslu hafi hann verið að hóta Hannesi ofbeldi, það er að birta viðkvæm skilaboð af stefnumótaforritinu Grindr.
„Ég get staðfest að þetta var grín og þessi samskipti eru ekki til“
Frægð Bassa hófst með sjónvarpsþáttunum Æði þar sem hann sjálfur, Patrekur Jaime og Binni Glee eru í aðalhlutverki. Jóhann Kristófer Stefánsson, leikstjóri þáttanna, var gestur í útvarpsþættinum Lestin á Rás 1 þar sem hann ræddi meðal annars um ólguna sem fylgdi færslum Bassa á Twitter. Jóhann segir til að mynda að ekkert af því sem Bassi skrifaði hafi verið skipulagt fyrirfram af aðstandendum þáttarins.
„Þetta er ekki kóreógrafað. Ég er bara vinur Bassa og hef verið að hjálpa honum að koma af stað þessum tónlistarferli og ég er til staðar fyrir hann, en það er engin leið fyrir neinn að temja Bassa. Hann gerir bara nákvæmlega það sem honum sýnist,“ sagði Jóhannes í þættinum.
Þá talar Jóhann um samskipti Hannesar og Bassa á Twitter og segir Hannes hafa stokkið fyrir byssukúluna með því að stíga í leikinn. „Prófessor í háskólanum og einn besti vinur valdamesta manns Íslandssögunnar fer einhvern veginn að segja við einhvern ungling að hann viti ekkert um hagvöxt og ætlaði að feisa hann,“ segir Jóhannes og bendir á að meint hótun Bassa um birtingu skilaboðanna sé augljóst grín. „Ég get staðfest að þetta var grín og þessi samskipti eru ekki til.“