Halldóra Mogensen, þingmaður Pírata, er nýjasti gestur Einkalífsins á Vísi. Í þættinum segir hún frá því að henni hafi verið nauðgað þegar hún var sautján ára gömul.
„Ég átta mig alveg á því að þetta hafði gríðarlega mikið áhrif á mitt líf en þegar ég var táningur þá var mér nauðgað. Á þessum tíma, ég er sautján ára, þá var þetta bara daglegt brauð liggur við,“ segir Halldóra í Einkalífinu.
Mörgum ungum konum í kringum hana var nauðgað á þessum tíma og ekkert rætt um það. Halldóra segir að önnur hver stelpa sem hún þekkir hefur átt svipaða lífsreynslu.
„Ég man að mjög góð vinkona mín kom út úr þessu með mjög mikla áverka og þegar hún steig fram og sagði frá þá var hún bara útskúfuð og fékk hótanir og hatursbréf og símtöl, þangað til að hún dró þetta allt bara til baka og sagði bara að þetta hefði verið mistök og afneitaði þessu til þess að vera tekin aftur í sátt,“ segir hún.
Halldóra segir að hún hafi kennt sér sjálfri um eftir nauðgunina. Henni datt ekki í hug að kæra því hún taldi þetta vera sér að kenna. Í langan tíma eftir á bar Halldóra enga virðingu fyrir sér sjálfri og þetta hafði mikil áhrif á tengsl hennar við aðra, sérstaklega karlmenn.
Í þættinum, sem má horfa á hér að neðan, segir hún frá því hvernig henni hafi tekist að vinna í þessu og fyrirgefa. Hún ræðir einnig um erfiða æsku, móðurhlutverkið og ýmislegt annað.