Melania Trump óskaði syni sínum, Barron Trump, til hamingju með fimmtán ára afmælið á Twitter.
Fyrrverandi forsetafrú Bandaríkjanna deildi mynd af blöðrum í laginu eins og tölustafirnir 15 og skrifaði „Til hamingju BWT“ með færslunni ásamt þremur hjörtum.
Það er óhætt að segja að færslan hefur vakið misjöfn viðbrögð. Hún hefur verið tætt í sundur af netverjum og segja gagnrýnendur myndina meðal annars vera „óhugnanlega“ og „furðulega.“
En aðrir hafa komið Melaniu til varnar og segja að þetta sé óþarfa gagnrýni frá „Trump-hatursmönnum“ og færslan hafi einfaldlega verið „móðir að fagna syni sínum.“
Happy birthday BWT ❤️❤️❤️ pic.twitter.com/8AVZEhLeMg
— MELANIA TRUMP (@MELANIATRUMP) March 20, 2021
Melania deilir sjaldan einhvers konar kveðju eða opinberum samfélagsmiðlafærslum um son sinn. Þrátt fyrir að faðir hans, Donald Trump, hafi verið forseti Bandaríkjanna í fjögur ár, þá er lítið vitað um Barron Trump.
Við upphaf forsetatíðar Donald Trump bað Hvíta húsið um að einkalíf Barrons yrði virt. „Það er löng hefð fyrir því að börn forseta fái tækifæri til að alast upp utan við pólitíska sviðsljósið. Hvíta húsið ætlast til þess að sú hefð haldi áfram.“
Vegna þess hversu lítið er vitað um Barron Trump þá hafa ýmsar kenningar verið á sveimi um líðan hans og aðstæður. Í nóvember í fyrra var herferð á vegum unglinga á samfélagsmiðlinum TikTok um að „bjarga“ Barron frá föður sínum. Myllumerkið #SaveBarron eða #BjörgumBarron var notað við birtingu fjölda myndbanda sem má sjá hér að neðan.