Einu sinni var Emmsjé Gauti bara ungur drengur með stóra drauma, spangir og svakalegan hatt.
Það muna kannski ekki margir eftir því, en Emmsjé Gauti tók þátt í Idol stjörnuleit þegar hann var sextán ára, og kallaði sig þá MC Gauti.
Myndband af áheyrnarprufunni hefur verið að slá í gegn á TikTok. Notandinn @islensknostalgia deildi því á dögunum og hefur það fengið um 40 þúsund áhorf.
Í myndbandinu má sjá Emmsjé Gauta rappa fyrir framan dómarana, sem voru Bubbi Morthens, Sigga Beinteins, Páll Óskar og Einar Bárða.
„Þetta var ferlega flott en þetta á ekki heima í þessari keppni. En ég segi í guðanna bænum ekki hætta, við þurfum á svona fólki eins og þér að halda, takk fyrir,“ sagði Bubbi við unga rapparann eftir prufuna.
Sigga Beinteins sagði nei og líka Páll Óskar, en hann ráðlagði Emmsjé Gauta að fara í leiklistarskólann eða halda áfram að rappa.
Emmsjé Gauti fékk nei frá öllum dómurum, en ekki vegna skorts á hæfileikum heldur því þau töldu hann og rappið einfaldlega ekki eiga heima í keppninni. Það litla sem þau vissu, að fyrir framan þau væri drengur sem yrði einn stærsti og vinsælasti rappari Íslands.
Horfðu á áheyrnarprufuna í heild sinni hér að neðan.