Noomi Rapace, aðalleikkona kvikmyndarinnar Lamb, ræddi um reynsluna af því að leika í myndinni í samtali við tímaritið The Wrap á dögunum. Þar talar hún sérstaklega um einn meðleikara sinn en hún segir samstarf þeirra hafa gengið brösulega.
Noomi sat og beið eftir að kallað væri á hana, verið var að bíða eftir því að ær væri tilbúin að fæða lamb. Þegar kallið kom hljóp leikkonan af stað í hlöðuna. „Lambið er að koma!“ var kallað á hana.
„Okei, ég er bara að fara stinga höndunum mínum þangað inn! Ég býst við því að þetta sé það sem við erum að gera,“ hugsaði hún með sér á meðan hún fór í átt að hlöðunni.
Noomi segir að henni hafi ekki fundist jafn erfitt að undirbúa sig fyrir senuna og margir myndu halda. Henni leið þó furðulega þegar hún byrjaði að leika með ærinni. „Þetta var svo grimmt! Mér fannst eins og hún [ærin] væri bein ógn við hamingjuna mína. Þetta var skrýtið,“ segir hún.
„Við áttum ekki í góðu sambandi, ég og ærin,“ segir leikkonan svo í háði. „Þegar ég kom á kvikmyndasettið leið mér alltaf eins og hún væri að stara á mig.“
Henni leið eins og ærin væri að tala við hana. „Horfðu í burtu kona! Láttu mig vera!“ fannst henni hún segja við sig. „Hún var að stappa, reyna að hræða mig og ég var bara: Þú getur ekki hrætt mig tík!“