Hugleikur Dagsson, listamaður og skemmtikraftur, birti skopmynd á dögunum, líkt og hans er vaninn, á samfélagsmiðlum sínum. Ekki væri það því í frásögur færandi nema fyrir það að birtingin varð til þess að hann hefur verið settur í 30 daga bann á Facebook þar sem hann má hvorki streyma beint né auglýsa.

Hugleikur hefur lengi verið landsmönnum kunnur fyrir kolsvartan húmor sem leikur oftar en ekki stórt hlutverk í list hans.

Að þessu sinni birti hann mynd sem sýndi brennandi kross og meðlim í rasísku hryðjuverkasamtökunum Ku Klux Klan sem eru þekkt fyrir ofsóknir sínar gegn svörtu fólki. Á myndinni er KKK meðlimurinn að segja að „Fólk er svo viðkvæmt nú til dags.“

Ástæðan fyrir banninu er sú að Facebook metur myndefnið sem brot á reglum miðilsins um hættulega einstaklinga og samtök eða með öðrum orðum – misbauð miðlinum.

Hugleikur deildi tilkynningu Facebook um bannið á Twitter og benti á að það væri nokkuð kaldhæðnislegt að hann væri settur í bann fyrir skopmynd sem fól í sér ádeilu á þá sem gjarnan kasta steinum úr glerhúsi þegar þeir fullyrða að fólk í dag sé orðið of viðkvæmt.

Oh, the irony. pic.twitter.com/lvYfhC4fo4

— dagsson (@hugleikur) November 30, 2021