Finnur Þór Vilhjálmsson saksóknari var heldur betur í skýjunum þegar hann sá að í skjóli nætur hafði einhver snarað upp glæsilegu vegglistaverki á endavegg bílskúrsraðarinnar hjá heimili hans. „Þetta er mjög skemmtilegt. Við vöknuðum og þetta var allt í einu komið á vegginn,“ segir hann.
Algengt er að fólk kvarti undan veggjakroti en Finnur bendir á að þetta sé nefnilega alls ekki veggjakrot heldur veggjalist. Þá eru nágrannarnir líka afar ánægðir, eftir því sem hann veit best til. „Maður hefði ekki getað beðið um neitt betra,“ segir hann.
Finnur deildi mynd af veggjalistinni á Twitter í dag og auglýsti eftir listamanninum: „Ef svo (ólíklega kannski) vill til að hann/hún sé á forritinu – þá bara bestu þakkir fyrir!,“ skrifaði Finnur.
Þegar verkið er skoðað vel sést að höfundurinn hefur merkt sér það með nafninu Kraak-N. Einn nágranni Finns tók eftir þessu og fann þá Instagramsíðu listamannsins þar sem hann deilir fjölda verka. Hann virðist búa erlendis og þeir sem skrifa athugasemdir hjá honum skrifa flestir á frönsku. Þá er nýjasta verkið á Instagramsíðunni taggað með nafni frönsku borgarinnar Marseilles. En meira vitum við ekki.
„Við vorum bara heppin að fá þetta flotta vegglistaverk,“ segir Finnur og bætir við: „Við vonum bara að þetta fái að vera í friði.“
Nokkrar athugasemdir eru þegar komnar við færslu Finns þar sem fólk dáist að verkinu og einn segir hreinlega: „Hann má koma og mála bílskúrinn minn.“
Óþekktur listamaður snaraði þessu glæsilega verki óumbeðinn upp á endavegg bílskúrsraðarinnar hjá okkur í fyrrinótt. Held (og vona) að allir íbúar hússins séu jafnsátt og við. Ef svo (ólíklega kannski) vill til að hann/hún sé á forritinu – þá bara bestu þakkir fyrir! pic.twitter.com/GOGo6ekzka
— Finnur Þór Vilhjálmsson (@FinnurV) November 28, 2021
Hér gefur að líta tvö verk eftir Kraak-N
View this post on Instagram
View this post on Instagram
