Þegar Paulette Alexander sá auglýsingu fyrir gervijólatré á Facebook leist henni vel á bæði tréð og verðið á því. Hún ákvað því að slá til og kaupa það en þegar það kom heim til hennar var það allt öðruvísi en í auglýsingunni.
Tréð sem um ræðir keypti Paulette úr netversluninni Uakie en í auglýsingunni sem hún sá var tréð afar glæsilegt. Í auglýsingunni var sagt að það tæki aðeins fimm mínútur að setja tréð upp og þá var hægt að stjórna ljósunum á því með fjarstýringu.
Eins og áður segir þá keypti Paulette tréð, nánar tiltekið þá gerð sem er tæplega 2 metrar á hæð. Hún fékk tréð heimsent en þegar hún opnaði það varð hún fyrir miklum vonbrigðum. Hún greindi frá vonbrigðum sínum í færslu sem hún birti á Facebook en The Sun vakti athygli á færslunni.
Í stað þess að fá glæsilegt tré þá fékk Paulette eitthvað sem líkist frekar einni grein. Hún hafði samband við Uakie vegna þessa en á en eftir að fá endurgreitt. Síðan Paulette hafði samband hefur vefverslunin fjarlægt tréð af vefsíðu sinni.
„Ég gat ekki hætt að hlægja, þau hljóta að hafa brotið grein af trénu og haldið að ég yrði bara ánægð,“ segir Paulette. „Það var sagt að tréð kæmi frá Bandaríkjunum en eftir að ég borgaði og fékk tölvupóst til staðfestingar þá kom upp að það væri frá Kína.“