Margir hafa tekið eftir blóðugri dagsetningu á samfélagsmiðlum síðustu daga, 25.12, en það er dagurinn sem fyrsti þáttur Svörtu Sanda fer í loftið. Stöð 2 ætlar að frumsýna fyrsta þátt á jóladag og svo næsta þátt strax kvöldið eftir á annan í jólum.
Glassriver framleiða, leikstjóri Baldvin Z en hann, Aldís Amah Hamilton og lögreglumaðurinn Ragnar Jónsson skrifa handritið. Aldís fer sjálf með aðalhlutverkið í þáttunum, hlutverk Anítu. Með önnur helstu hlutverk fara Þór Tulinius, Steinunn Ólína Þorsteinsdóttir, Ævar Þór Benediktsson og Kolbeinn Arnbjörnsson.
Um þættina: Aníta, þrítug lögreglukona, neyðist aftur á æskuslóðirnar sem hún flúði fyrir 14 árum. Uppgjör við móður hennar er óumflýjanlegt en líkfundur af ungri konu kollvarpar öllu. Aníta sogast niður dimman hyl fortíðar í leit að mögulegum fjöldamorðingja og uppgjörið breytist í martröð.
Sjáðu stikluna hér að neðan.