Það heyrir alltaf til tíðinda þegar gleðipinnarnir í Baggalúti gefa út nýtt jólalag. Það átti sér stað um helgina þegar lagið „Styttist í það“ kom út á öllum helstu streymisveitum. Lagið, sem er af ítölsku bergi brotið, er þegar komið í spilun á helstu útvarpsstöðum og hefur fallið vel í kramið hjá aðdáendum sveitarinnar nema þeim sem styðja íþróttafélagið Fram.
Þannig vill til að liðsmenn Fram gáfu út sérstakt ólalag árið 2019 – „Fram að jólum“ – sem er nákvæmlega sama lag og Baggalútar gerðu að sínu. Á heimasíðu Fram er þjófnaðurinn gerður að umtalsefni og telja þeir bláklæddu að á þeim hafi verið brotið – þeir stálu laginu jú fyrst.
DV hefur borist athugasemda frá Braga Valdimar Skúlasyni vegna málsins:
„Þetta er auðvitað stórskemmtilegt! En bara svo það sé á tæru þá er Baggalútur með öll leyfi frá rétthöfum þessa lags til að nota það — enginn stuldur þar.
Áfram Fram!“