Brynjar Níelsson er hættur á Alþingi og íhugar nú næstu skref sín á vinnumarkaði. Hafa margir búist við því að hann láti staðar numið í stjórnmálavafstri sínu. Greinilegt er að sonur Brynjars, lögfræðingurinn Helgi, er á öðru máli en frá þessu greinir þingmaðurinn fyrrverandi í skemmtilegri færslu á Facebook-síðu sinni. Miðað við þá skelfingu sem virðist hafa gripið um sig í brjósti Brynjars má telja að hann sé hvergi nærri hættur í pólitík.

„Ég er ekki auðugur maður en á þó tvo syni sem ég hefði ekki viljað vera án. Ég hef núna verið í um 30 ár í stöðugri baráttu við þá um völd og áhrif innan fjölskyldunnar, þegar Soffía er ekki heima. Breytir engu þótt þeir séu löngu fluttir að heiman. Meðan ég var í pólitík hlífði ég þeim við að bera þessi átök á torg. Núna er breyttir tímar. Ósvífni og hvers kyns kúgun hefur einkennt baráttu okkar feðgana. Allt hefur það þó verið innan marka eða þar til yngri sonur minn, sem heitir Helgi, hótaði því að láta barnabörnin tilvonandi heita Helgu Völu og Hallgrím, ef ég hætti í pólitík. Einhver myndi segja að þetta væri kúgun aldarinnar,“ segir Brynjar.