Snemma á miðvikudagskvöld verður haldinn fyrirlestur um hið áhugaverða og viðkvæma málefni, dánaraðstoð. Það eru samtökin „Verndum veika og aldraða“ sem standa að fyrirlestrinum sem haldinn verður í Neskirkju við Hagatorg í Reykjavík, kl. 18 á miðvikudag.

Yfirskriftin er: „Að fá að deyja með reisn – fyrirlestur um dánaraðstoð.“ Ingrid Kuhlman flytur fyrirlesturinn og verða umræður að honum loknum. Á Facebook-síðu viðburðarins segir:

„Faðir Ingridar var með þeim fyrstu í Hollandi til að fá dánaraðstoð (á löglegan hátt) í apríl 2002, aðeins 11 dögum eftir að lögin um dánaraðstoð tóku gildi. Ingrid mun segja sögu föður síns og ræða þetta mikilvæga og viðkvæma málefni. Hún er formaður Lífsvirðingar, félags um dánaraðstoð, sem var stofnað 2017. Markmið félagsins er m.a. að stuðla að opinni, uppbyggilegri og víðtækri umræðu um dánaraðstoð og vinna að því að samþykkt verði löggjöf um það að við vissar, vel skilgreindar aðstæður, og að uppfylltum ströngum skilyrðum, verði dánaraðstoð mannúðlegur valkostur fyrir þá sem kjósa að deyja með reisn.“

Eru allir sem hafa áhuga á málefninu hvattir til að mæta og taka þátt í umræðum sem verða að loknum fyrirlestrinum.