Rithöfundurinn, grínistinn og fyrrverandi borgarstjórinn Jón Gnarr opnar sig um hvernig hann tókst við andlát móður sinnar í hlaðvarpsþættinum Karlmennskan.
Jón notaði varalit móður sinnar til að hafa einhverja tengingu við hana. Þetta var nokkrum mánuðum eftir að hann tók við sem borgarstjóri og var vinsamlegast beðinn um að hætta að vera með varalitinn, því öðrum karlmönnum þótti það óþægilegt.
„Þegar ég var búinn að vera borgarstjóri í nokkra mánuði þá dó mamma mín á jóladag 2014. Það var svakalegt áfall,“ segir hann.
Jón segir að honum hefði ekki gefist neinn tími til að syrgja. „Það var það bara ekki. Ég þurfti bara að mæta í viðtöl og tala um Orkuveituna og eitthvað svona. Og það var öllum sama, þannig sé, um að ég hefði misst mömmu. Fólki fannst það ekki mikilvægt eða áhugavert. Það var krafa um að ég mætti á ákveðna fundi og svona,“ segir hann.
„Ég tók heim til mín öskubakkann hennar og varalitinn. Ég varalitaði mig með varalitnum hennar og naglalakkaði mig. Tengdamamma mín naglalakkaði mig meira að segja með naglalakkinu hennar mömmu.“
Jón fór í vinnuna með varalit og naglalakk. „Ertu með varalit? Ég sagði: „Já. Þetta er varaliturinn hennar mömmu, hún dó í síðustu viku.“ […] Þetta var mín leið til að hafa einhvern hluta af mömmu með mér og geta á einhvern hátt minnst hennar og syrgt hana. Á endanum var ég beðinn um að hætta þessu, af mínu samstarfsfólki. Þetta var að fokka upp þessum köllum sem eru að koma hérna,“ segir Jón Gnarr.
View this post on Instagram
Í þættinum fara Jón Gnarr og Þorsteinn um víðan völl. „Við ræddum um kallakallinn sem hefur stundum af honum völdin, hvernig það er að vera hvítur miðaldra karlmaður, afahlutverkið, foreldrahlutverkið, karllægni íslenskunnar, karlmennsku og upphandleggsvöða, karldýrkunina í okkar samfélagi, móðurmissinn, borgarstjórnartímann og vináttu svo fátt eitt sé nefnt,“ skrifar Þorsteinn í lýsingu sinni um þáttinn.
Þú getur hlustað á þáttinn í spilaranum hér að neðan, á Spotify eða Podcasts.
