10 tonn af kynlífleiktækjum og kynlífsjóladagatölum eru komin til landsins og önnur 10 tonn eru á leiðinni en þessi samtals 20 tonn eru öll á leiðinni í eina og sömu kynlífstækjaverslunina, Blush. Gerður Arinbjarnardóttir, eigandi Blush, ræddi við Loga Bergmann og Sigga Gunnars um jólavertíðina í Síðdegisþættinum á K100 í gær.
„Við höfum svona hægt og rólega bætt við okkur. Þetta eru náttúrlega jóladagatölin. Það er orðið þekkt hér á landi hvað Blush-jóladagatölin eru vinsæl og þau seljast alltaf upp löngu fyrir tímann,“ segir Gerður.
Hún segir þá að einhverjir gætu haldið að það væri fullsnemmt að byrja að selja jóladagatöl í október. „En það hefur bara sýnt sig síðustu árin að því fyrr sem við byrjum því líklegra er að við náum að fá síðustu sendinguna á réttum tíma því við búum á eyju. Það er vandamál og sérstaklega núna í „kóvitinu“. Það er búinn að vera svo mikill gámaskortur.“
Eflaust velta margir því fyrir sér hversu mörg dagatöl eru í þessum 20 tonnum og Gerður svarar því. „7.000 dagatöl og við erum búin að fá fyrstu 10 tonnin og vonandi koma næstu 10 tonn um miðjan október til okkar. Við gátum náttúrulega ekki tekið á móti þessu öllu því við blokkeruðum umferð á Dalveginum þegar þetta kom. Þannig við tókum bara einn gám í einu.“