Kona var vægast sagt mjög hissa þegar hún skoðaði myndir úr nýlegu ferðalagi sínu til New York.

Mae Archie deilir sögunni á TikTok. Hún deildi myndbandi af augnablikinu þar sem hún áttaði sig á að enginn annar en tónlistargoðið Paul McCartney hafi verið óvænt á einni mynd.

Á myndinni má sjá Mae fara yfir gangbraut og um tveimur metrum frá henni er Paul McCartney, einnig að fara yfir gangbrautina.

Það sem gerir þetta enn stórkostlegra er að Mae var nýkomin af sýningu um Bítlana á Metroplitan listasafninu. En því miður tók hún ekki eftir Bítlinum á gangbrautinni fyrr en hún var komin heim.

Mae viðurkennir að hún hafi „fríkað út“ þegar hún sá myndina. Hún segir að eftir að vinkona hennar hafi tekið myndina, þá hafi hún náð mjög stuttu augnsambandi við Paul. „Ég hugsaði hvaðan ég þekkti hann eiginlega og hann blikkaði mig,“ segir hún, en Mae pældi ekkert meira í þessu og hélt bara áfram að ganga.