Zara Holland, fyrrverandi ungfrú Bretland og raunveruleikastjarna, og kærasti hennar, Elliott Love, hafa verið handtekinn á Barbados. Ástæðan á að vera sú að þau reyndu að flýja land eftir að Love var greindur með COVID-19. Love átti að vera í einangrun, og Holland í sóttkví. Í stað þess að fylgja því eru þau sögð hafa flúið út á flugvöll, þar sem þau voru handtekinn. Bresk götublöð hafa fjallað mikið um málið.
Holland og Love eru frá Bretlandi, en hafa verið í fríi á Barbados frá því á sunnudag. Eftir að hafa farið í skimun við komu til landsins fengu þau rauð armbönd á hótelinu sínu, sem sýndu að þau hefðu ekki fengið neikvætt úr sýnatökunni. Þegar í ljós kom að Love væri greindur með veiruna eiga þau að hafa klippt þessi armbönd af sér og flúið, en starfsfólk hótelsins fann armböndin og gerðu lögreglu viðvart.
Þau gætu hvort fyrir sig átt yfir höfði sér 18 þúsund punda sekt, sem jafngildir meira en þremur milljónum króna, og eins árs fangelsisvist. Til eru fordæmi um þannig dóma fyrir álíka brot á Barbados sem hefur sloppið ansi vel frá faraldrinum, með einungis 383 tilfelli og sjö dauðsföll frá því hann hófst, en þjóðin er aðeins fámennari en Ísland.
Því hefur verið haldið fram að sóttkvíin hafi farið illa í parið, og þá sérstaklega Holland. Í yfirlýsingu frá henni segir hún að málið væri „einn stór misskilningur“ og að nú ynnu þau með stjórnvöldum við það að leysa málið.
„Ég hef verið gestur á þessari frábæru eyju oft og mörgum sinnum í bráðum tuttugu ár. Ég myndi aldrei gera neitt sem er skammarlegt fyrir þessa þjóð sem ég virði og elska,“
Zara Holland hefur áður valdið usla. Hún gerði garðinn frægan þegar hún vann titillinn ungfrú Bretland árið 2015, en var svipt titlinum eftir að hún stundaði kynlíf með öðrum keppanda í Love Island-raunveruleikaþættinum.
