Chloe Bond, 28 ára bresk móðir, reynir nú að sannfæra vinkonur sínar um að fylgja sínu ráði, það er að endurnýta túrtappa.
Chloe byrjaði að skoða aðrar leiðir til að halda tíðunum í skefjum þegar hún eignaðist dóttur sína árið 2013. Þá uppgötvaði hún túrtappa úr efni sem hægt var að þrífa í þvottavélinni. Chloe segir að hægt sé að nota umrædda túrtappa í 6 tíma og svo skellir hún þeim bara í vélina og notar kalt vatn, þvottaduft og mýkingarefni. Hún þurrkar þá síðan og eftir það getur hún notað þá á ný.
Vinkonur Chloe hafa sagt að þessi aðferð hennar sé „ógeðsleg“ en henni er alveg sama. „Þeir eru algjör lífsbjörg,“ segir Chloe um túrtappana í samtali við The Sun. „Síðan eru þeir líka betri fyrir plánetuna.“
Chloe, sem vinnur sem ökukennari, ákvað að prófa þessa öðruvísi túrtappa eftir að henni leið ekki svo vel í kjölfar fæðingar dóttur sinnar. „Ég fékk mjög slæma sýkingu eftir rúmlega tveggja daga langa fæðingu. Þegar ég fór aftur á blæðingar byrjaði ég að nota venjulega túrtappa aftur eins og ég gerði fyrir fæðinguna en þeir meiddu mig og voru þurrir,“ segir Chloe.
„Ég gat ekki notað þá. Þetta hljómar fáránlega en ég gat ekki haldið því áfram. Ég vildi finna einhverja aðra lausn og þegar ég fann þessa endurnýtanlegu túrtappa var ég spennt. Til að vera alveg hreinskilin þá verð ég að segja að mér fannst þetta líka smá ógeðslegt fyrst.“
Chloe segir að vinir hennar og aðrir sem heyrðu af notkun hennar á þessum túrtöppum hafi verið með leiðindi við hana. „Fólk hefur ekki tekið vel í þetta og segir að þetta sé ekki hreinlegt. Fólk hefur sagt við mig að þvottavélin mín hljóti að vera ógeðslegt en það er fáránlegt. Þvottavélin þrífur sjálfa sig – skíturinn safnast ekki upp!“