Þýskur ferðamaður sem var í öngum sínum eftir að mótorhjóli hans var stolið í sumar er hrærður af þakklæti í garð Íslendinga og hjólahvíslarans Bjartmars Leóssonar. Er Þjóðverjinn var hér á landi síðasta sumar var mótorhjóli hans stolið úr bílakjallara Hótels Kletts örskömmu fyrir brottför hans frá landinu.

Hjólahvíslarinn Bjartmar Leósson setti þá í gang deilingarátak á Facebook og var mynd af hjólinu og tilkynningu um þjófnaðinn deilt um 2.000 sinnum. DV birti frétt um málið og hvatti lesendur til að deila tilkynningunni. Tókst að hafa uppi á hjólinu í tæka tíð og lögregla kom því í hendur Þjóðverjans. Að sögn Bjartmars lagði lögregla mikla vinnu í að finna hjólið en Facebook-deilingarnar vöktu mikla athygli. Tæpara mátti það ekki standa því það tókst að skila því til Samskipta daginn fyrir brottför sem var snemma næsta morgun.

Þjóðverjinn sendi í dag kveðju á Facebook-hóp Bjartmars þar sem Bjartmar heldur utan um starf sitt við að endurheimta stolin hjól. Birtir hann meðal annars mynd af frétt DV um málið.

Þjóðverjinn þakkar þar Bjartmari sérstaklega fyrir hjálpina og segir: Ég vil hérna í grúppunni þakka einu sinni enn honum Bjartmari Leóssyni sem var mér svo hjálplegur í fríinu mínu í sumar þegar mótorhjólið mitt fannst.

Þjóðverjinn er hrifinn og undrandi yfir öllum Facebook-tilkynningunum um málið sem hjálpuðu til að finna hjólið og segir: „Stórkostlegt að sjá svona marga hjálpa einhverjum sem þeir þekkja ekki“