Hafþór Júlíus Björnsson, kraftlyftinga- og hnefaleikamaður, mætir Devon Larratt í hringnum á laugardaginn í Dubai. Hann hefur nú lagt 5000 dollara, eða 652 þúsund kórónur, undir í veðmáli um hvorum þeirra takist að brjóta nefið á hinum í bardaganum.
Þetta kom fram á blaðamannafundi í dag þar sem Hafþór sagði : „Hvað get ég sagt við þennan kauða? Mér líkar vel við hann, en ég ætla að berja hann í klessu.“
Hafþór sagði að hann væri í erfiðri stöðu. „Ég er í erfiðri stöðu hérna, hvað get ég gert? Ég brýt líklega á honum nefið. Sorry Devon en þetta er bara vinnan mín.“
Devon sem var líka á fundinum spurði Hafþór hvort hann væri tilbúinn að leggja pening undir.
„Heyrðu Þór, ef þú brýtur á mér nefið þá skal ég persónulega gefa þér 65 þúsund krónur af verðlaununum mínum. Ég held að ekki að þér takist það. Og ég held að brotið nef muni bara fara mér el, það myndi auka vinsældir mínar í heiminum. Ég myndi því líta betur út og fleiri myndu elska mig ef þú brýtur það, svo láttu bara vaða Þór, brjóttu á mér nefið, við skulum sjá hvernig það gengur.
En ef ég næ að brjóta á þér nefnið þá vil ég að þú borgir mér 650 þúsund krónur því þú klæðist flottari fötum en ég og þá get ég keypt mér svona jakkaföt og klæðst þeim næst þegar við gerum þetta.“
Nefbrots-veðmálið var svo innsiglað með handabandi og verður fróðlegt að sjá hvort þeim félögum takist ætlunarverk sitt á laugardaginn og hvort nef annars eða beggja verði krambrúlerað að bardaganum loknum.
Devon Larratt hefur sjálfur viðurkennt að hann sé „hryllilegur boxari“ og þó svo Hafþór Júlíus teljist enn nýgræðingur í sportinu þá hafi hann þó einhverja reynslu.
„Þór er greinilega með meiri reynslu en ég veit að í bardaga þá þarf bara eitt heppilegt högg, svo ég þarf að landa stjarnfræðilegu höggi á nefið hans,“ sagði Devon. „Svo vertu tilbúinn, högg beint í smettið.“