Nýlega hófu þættirnir #Samstarf göngu sína á Stöð 2+ en í þáttunum reyna áhrifavaldarnir Sunneva Einarsdóttir og Jóhanna Helga Jensdóttir fyrir sér í hinum ýmsu störfum um landið. „Þær stöllur verða settar í aðstæður sem teygir þær langt út fyrir þægindarammann,“ segir í lýsingu Stöðvar 2 á þáttunum. Þættirnir virðast sækja einhvern innblástur í bandarísku raunveruleikaþættina Simple Life sem voru nokkuð vinsælir skömmu eftir síðustu aldamót.

Sunneva og Jóhanan prófa til að mynda að vinna sem sundverðir, stöðumælaverðir og sem starfsmenn í Sorpu í þáttunum. Miðað við stiklur og brot úr þáttunum eru þær stöllur ekki svo hrifnar af því að vinna í sumum þessara starfa. „Alltaf er maður settur í eitthvað skítastarf,“ má til að mynda heyra Sunnevu segja í stiklu þáttarins á meðan hún prófar að vinna sem starfsmaður Sorpu.

Grafíski hönnuðurinn Bobby Breiðholt birti í gær harðorðaða færslu á Twitter sem vakið hefur mikla athygli á samfélagsmiðlinum. Nokkuð ljóst er að hann er að tala um þættina #Samstarf í færslunni en hann segir það vera viðbjóð að láta „moldríka áhrifavalda gera grín að láglaunastörfum“.

Að láta einhverja moldríka áhrifavalda gera grín að láglaunastörfum er svo ógeðslega mikill viðbjóður.

— Bobby Breiðholt (@Breidholt) September 11, 2021

Ljóst er að grafíski hönnuðurinn er ekki einn á þessari skoðun þar sem fleiri hundruð hafa líkað við færslu hans. Þá hafa fjölmargir tekið undir með orðum hans í athugasemdunum.

„Ætla ekki að horfa á þetta rugl og er að spá í að banna 10 ára dóttur minni það. Hún veit ekkert hvaða skvísur þetta eru en posterinn heillar í VODinu,“ segir til að mynda kona nokkur í athugasemdunum. „Svo hjartanlega sammála. Þvílík vanvirðing við fólk sem vinnur þessi mikilvægu störf. Brjálast við tilhugsunina,“ segir svo önnur.

Fleiri taka í svipaða strengi. „Þessir þættir eru svo fucked up. „Hvað ef þetta fína fólk væri í VENJULEGUM STÖRFUM eins og einhverjir aumingjar? Væri það ekki ógeðslega fyndið?“ Ömurleg pæling,“ segir til að mynda maður nokkur. „Guð en skammarlegt og ömurlegt!!“ segir svo kona nokkur eftir að hafa séð stikluna fyrir þættina sem sjá má hér fyrir neðan.