Spjallþáttastjórnandinn James Corden hefur fengið tímabundið nálgunarbann gegn konu sem hefur áreitt hann og vill að eigin sögn giftast honum.
Samkvæmt gögnum málsins þá er um að ræða 30 ára konu sem hefur setið um fyrir Corden um nokkurt skeið. Meðal annars á hún að hafa setið um heimili hans í Los Angeles í tæpa viku í sumar og yfirgaf aðeins svæðið eftir að lögregla hafði afskipti af henni.
Corden segir að með tíma hafi áreitnin ágerst. Konan á að hafa birst á upptökustað þáttar Corden og tilkynnt þar hverjum sem heyra vildi að hún væri þangað komin til að giftast þáttastjórnandanum.
Corden segist ekki kunna deili á konunni en segir hana engu að síður hafa tilkynnt lögreglu að hún og Corden hefðu áform um að hlaupast brott saman til að láta gefa sig saman í Las Vegas.
Konan mun standa í þeirri trú að eiginkona Corden til margra ára, Julia Carey, hafa stolið Corden frá henni og sé eina hindrunin á leið þeirra í hjónabandssæluna.
James segist óttast að eiginkonu hans og börnum standi ógn af eltihrellinum, einkum í ljósi þess að konunni hafi þegar tekist að komast nærri heimili hans og vinnustað.
Samkvæmt nálgunarbanninu má konan ekki koma nærri Corden, konu hans og börnum en 100 metra og þarf að lata af öllum tilraunum til að setja sig í samband við stjörnuna.