Vefsíðan Boomerang hefur verið áberandi í fjölmiðlum að undanförnu en nú er vefsíðan komin í loftið að fullu. Á vefsíðunni er hægt að borga frægum Íslendingum fyrir persónulegar kveðjur en kveðjurnar kosta flestar í kringum 10-15 þúsund krónur.
DV fjallaði um verðin á vefsíðunni í gær. Var þá tekið fram að hæsta verðið fyrir kveðju á síðunni væri 30 þúsund krónur en það var fyrir kveðju frá tónlistarmanninum Mugison. Nú virðist vera sem tónlistarmaðurinn Geir Ólafsson hafi ákveðið að sprengja upp kveðjumarkaðinn því verðið á kveðju frá honum hefur hækkað úr 15 þúsund krónum og upp í 500 þúsund krónur.
Í samtali við DV segir Geir að allar tekjur af kveðjukaupunum muni renna til góðgerðarmála fyrir börn. „Börn eru ofarlega í huga mínum og ég vil styrkja þau. Ég mun nota allan þann pening í að styrkja þau,“ segir hann.
„Maður á að nota svona vettvang í öðrum tillgangi en til að græða á því sjálfur. Þetta er alveg kjörið tækifæri fyrir stóra hópa að taka þátt í þessu,“ segir Geir og tekur fram að hann mun vanda til verka og sjá til þess að þeir sem kaupi kveðjur af honum verði ánægðir.
Jón Bjarni, ein skærasta Twitter-stjarna landsins um þessar mundir, er á meðal þeirra sem hafa vakið athygli á hækkuninni á kveðju frá Geir. Jón benti á það að kveðja frá tónlistarmanninum kostar jafn mikið og notuð mjólkurhristingsvél á Bland.is.
Geir Ólafs eða Notuð shakevél af bland? pic.twitter.com/4gPDJxUN2I
— Jón Bjarni🇵🇸 (@jonbjarni14) June 23, 2021
Á Boomerang má að sjálfsögðu finna fleira íslenkst frægt fólk. Fólkið skiptist í fjóra flokka á síðunni, áhrifavalda, tónlistarfólk, íþróttafólk og fjölmiðlafólk. Alls er hægt að kaupa kveðjur frá 49 frægum Íslendingum á síðunni. Má þar til að mynda nefna Mugison, Birgittu Haukdal, Ingó Veðurguð, Egil Ploder, Heiðar Helguson, Birgittu Líf og Ásdísi Rán.
