Allt er nú til í heiminum og að líkindum má finna flest í Bandaríkjunum. Þar í landi hefur nú kona að nafni Casey Garcia verið handtekinn og ákærð fyrir nokkuð undarlegt brot. Hún þóttist vera 13 ára dóttir sín í skóla. Já þið lásuð þetta rétt.
Casey sjálf er 30 ára gömul og deildi þessari tilraun sinni á YouTube á fimmtudaginn. Sagði hún að þetta væri félagsfræðileg tilraun sem hún framkvæmdi með því að dulbúa sig sem ungling til að sýna fram á hversu lélegt öryggi væri í barnaskólum.
Hún klæddi sig í gula hettupeysu, setti á sig gleraugu og var að sjálfsögðu með COVID-19 andlitsgrímurnar sem við elskum öll svo mikið og eigum eftir að sakna svo sárt þegar grímuskyldan verður með öllu afnumin.
Casey litaði einnig á sér hárið og setti á sig gervibrúnku til að líkjast dóttur sinni meira. Samkvæmt lögregluskýrslu er Casey 1,5 m á hæð og 47 kg að þyngd.
Á myndbandinu sem hún deildi sést hún ganga taugaveikluð inn í skólann og heila þar skólastjóranum. Hún mætir svo í kennslustundir, hangir með vinkonum dóttur sinnar – sem virðast vita hvað er í gangi – og fær sér að borða í matsalnum.
Casey segir að hún hafi næstum komist í gegnum heilan skóladag þegar hún var loksins „nöppuð“ (e. caught) af kennara og send til skólastjórans.
Hún sagði eftir á að hún hefði ekki komist svona langt með þessa tilraun ef hún hefði ekki haft vinkonur dóttur sinnar sem hjálpuðu henni að viðhalda blekkingunni.
„Ég gerði þetta til að sanna svolítið. Ég sannaði að ég gat komist í gegnum almenningsskóla-kerfið,“ sagði hún
Í öðru myndbandi tók hún fram að einhverjum gæti fundist uppátækið „undarlegt“ en þetta hafi allt verið gert í þeim tilgang að sanna öryggisbrest í bandaríska skólakerfinu.
„Við þurfum betri öryggisgæslu í skólum,“ sagði hún. „Það er það sem ég var að reyna að sanna. Ég vil ekki hrokafull en mér finnst mér hafa tekist vel til.“
Daginn eftir að hún birti myndbandið var Casey handtekinn af lögreglu og verður ákærð fyrir hátternið, en í Bandaríkjunum getur það varðað refsingu að vera í óleyfi á lóðum og húsnæði almenningsskóla. Eins var henni gert að sökum að eiga við opinber skjöl.
Hins vegar hefur skóli dóttur hennar gefið út að öryggisferlar verði nú teknir til endurskoðunar svo Casey hafði eftir allt saman erindi sem erfiði. Reyndar hefur hún að líkindum ekki gert ráð fyrir refsingu fyrir vikið, en ekkert í þessum heimi er ókeypis.
