Það þykja alltaf tíðindi þegar harðjaxlinn Simon Cowell verður mjúkur sem sykurpúði. Simon er dómari í America’s Got Talent en hann hefur í gegnum sinn feril verið þekktur fyrir óvægni í dómarastólnum, jafnvel of harða á köflum. Í vikunni tókst þó keppanda í þáttunum að hreyfa við köldu hjarta hans.
Á sviði steig hin þrítuga Jen sem kallar sig Nightbird – eða næturgala – þegar hún er á sviði. Hún hefur varið undanförnum ári í að berjast við krabbamein og flutti fyrir dómarana í keppninni frumsamið lag.
„Ég er að syngja frumsamið lag sem heitir „Okey“. Það er sagan um síðasta árið í lífi mínu.“
Simon spurði Jen hvernig heilsa hennar væri í dag. Hún svaraði að heilsan væri almennt góð en „Síðast þegar ég vissi var ég enn með smá krabbamein í lungum, mænunni og lifrinni“
„Það er mikilvægt að allir viti að ég er svo miklu meira heldur en þeir slæmu hlutir sem hafa komið fyrir mig,“ sagði Jen svo áður en hún hóf flutninginn.
„Röddin þín er gullfalleg, alveg gullfalleg og ég er sammála um einlægnina. Það var eitthvað við þetta lag þar sem þú næstum því hversdagslega segir okkur frá því sem þú hefur gengið í gegnum…ó þú veist…“ sagði Simon og náði ekki að klára setninguna.
Jen greip þá orðið og sagði : Þú getur ekki beðið með hamingjuna þar til eftir að lífið hættir að vera erfitt.
Simon svaraði Jen að hann gæti því miður ekki sagt já og hleypt henni þannig áfram í keppninni. Hann væri nefnilega með nokkuð annað og betra. Síðan ýtti hann á Gullhnappinn við trylltan fögnuð viðstaddra. Svo hljóp hann upp á svið til að faðma næturgalann sem söng sig inn í hjarta hans.
