Ásgeir Hólm Agnarson tók að sér verkefni í stærri kantinum í gærkvöldi. Hann og fjölskylda hans tóku að sér kóp sem fæddist fyrir tímann og var yfirgefinn af móður sinni í fjörunni í Súðavík. Ásgeir hefur verið í sambandi við selasérfræðinga í Reykjavík.
„Hann var búinn að vera einn á sama stað síðan á fimmtudag eða föstudag í síðustu viku,“ segir Ásgeir í samtali við DV.
Kópurinn var orðinn horaður og ákvað Ásgeir að taka hann með sér heim. Hann segir kópinn hafa drukkið alveg óheyrilega og fær að drekka á þriggja tíma fresti. „Hann er sprækur,“ segir hann. „Svo leggur hann sig og svona.“
Ásgeir er í sambandi við selasérfræðing og segir að næsta skref sé að koma kópnum í sjó. Það er góð aðstaða í Súðavík til að leyfa honum að synda þar og prófa sig áfram. „Svo tökum við hann heim, þetta mun taka smá tíma. Hann þarf náttúrulega að læra að veiða,“ segir hann.
„Svo erum við með gamlan heitan pott í garðinum sem við erum búin að útbúa handa honum og setja stein þar sem hann kemst upp á og hann getur synt aðeins. En hann svaf bara í sturtuklefanum í nótt,“ segir Ásgeir.
Ólíklegir vinir
Heimilishundurinn var heldur betur ánægður með nýja gestinn.
„Hundurinn tók ástfóstri við hann strax. Hann er eins og taugaveikluð andamamma,“ segir Ásgeir og hlær. „Við megum ekki taka kópinn upp þá fríkar hundurinn alveg út.“
View this post on Instagram