Þann 1. febrúar 2004 voru tónlistarmennirnir Janet Jackson og Justin Timberlake að skemmta í hálfleik á Ofurskálinni (e. Super Bowl). Þar átti sér stað atvik sem er örugglega eitt frægasta og alræmdasta augnablik í langri sögu hálfleikjaskemmtunar Ofurskálarinnar.
Undir lok lagsins Rock Your Body átti Justin að fjarlægja brjóstahaldara Janet öðrum megin og geirvarta Janet, sem var skreytt einhvers konar skartgrip, var á sjónvarpsskjáum um 150 milljóna manna í rúma hálfa sekúndu.
Bandaríkjamenn voru hneykslaðir yfir atvikinu og sögðu Justin og Janet að þetta hefði ekki átt að fara svona, hann hefði óvart fjarlægt meira af brjóstahaldaranum en hann hefði ætlað að gera. En það hafði verið ýjað að því fyrir sýninguna að eitthvað „hneykslanlegt“ myndi gerast í hálfleik.
Stílistinn sem sá um búningana fyrir Justin og Janet hefur nú stigið fram og afhjúpað sannleikann á bak við atriðið. Hann segir að atriðið hafi farið alveg eins og það átti að fara.
Stílisti stjarnanna, Wayne Scot Lukas, sagði í samtali við Page Six að Justin hafi farið fram á „þessi búningamistök“. Wayne segir að Justin hafði viljað taka sviðsljósið frá Britney Spears, Madonnu og Christinu Aguileru, sem vöktu heimsathygli þegar þær smelltu blautum kossi hver á aðra á MTV-verðlaunahátíðinni nokkrum mánuðum áður.
„Hann vildi gera eitthvað stærra en þær,“ segir Wayne.
Hann segir að upphaflega átti Janet Jackson að vera í perlu G-streng, eins og Kim Cattrall hafði klæðst í þætti af Sex and the City.
„Janet átti að vera í Rocha kjól og Justin átti að stíga aftan á kjól hennar til að afhjúpa rassinn hennar í þessum perlu G-streng. En búningurinn breyttist nokkrum dögum áður, og þið sáuð töfrana,“ segir hann.
Því miður hafði þetta afdrifaríkar afleiðingar fyrir Janet, en ekki Justin sem kom fram aftur í hálfleik Ofurskálarinnar fjórtán árum seinna. Margar útvarps-og sjónvarpsstöðvar hættu að spila lög hennar eftir atvikið.
Justin bað Janet nýlega afsökunar opinberlega vegna atviksins og hvaða áhrif það hafði á hana.
